Kabla ya kung’ara kwenye majukwaa makubwa na kuteka chati za muziki duniani kote, mwanamuziki Asake alianza kujitafuta katika sanaa ya uigizaji. Hiyo imejionesha baada ya video kadhaa zikimuonesha akiwa kwenye uigizaji.

Asake ambaye jina lake kamili ni Ahmed Ololade Asake alisomea Sanaa ya Maigizo na Michezo ya Jukwaani katika Chuo Kikuu cha Obafemi Awolowo, baada ya kuhitimu alitumia ujuzi wake kwa kuonesha kipaji chake katika filamu kama Ijoba Ose Kan, majukwa ya maigizo pamoja na majukwaa ya vichekesho.

Kwenye moja ya mahojiano yake aliwahi kukiri kuwa alipenda sanaa ya maigizo huku akidai kuwa ndoto zake zilikuwa ni kuwa mwigizaji maarufu duniani lakini baada ya kuigia studio akili na moyo wake ulivutiwa sana kwenye uimbaji ndipo akaanza kujikita kwenye muziki.

Aliachia wimbo wake wa kwanza mwaka 2019 uitwao ‘African Something’ ambapo wimbo huo haukupata umaarufu. Mwaka 2022 Asake alianza kushika kasi baada ya kuachia wimbo ‘Mr Money’, ambao ulipata remix akiwashirikisha Zlatan na Peruzzi.

Februari 2022, mwanamuziki Olamide alimsajili Asake kwenye lebo ya ‘YBNL Records’ na katika mwezi huohuo, Asake alitoa ‘Extended Play’ yake ya kwanza iitwayo Ololade, iliyojumuisha wimbo wake uliompa mafanikio makubwa ‘Omo Ope’ akishirikiana na Olamide, pamoja na wimbo wa ‘Sungba’.

Aidha Agosti 2023, aliuza tiketi zote za tamasha lake la kwanza katika ukumbi wa ‘O2 Arena’ jijini London, akitua ukumbini akiwa ndani ya helikopta. Septemba 2023, akawa msanii wa kwanza wa Kiafrika kuuza tiketi zote za tamasha katika ukumbi wa ‘Barclays Centre’ jijini New York City.

Mpaka kufikia sasa msanii huyo amekuwa mmoja wa nyota wanaokimbiza zaidi huku akitamba na ngoma kama Lonely at the Top, Stubborn, Remember, Terminator, What's Up My G na nyinginezo.