Usiku wa kuamkia leo Mei 27, 2025, limefanyika tukio la ugawaji wa tuzo za American Music Award's (AMA) huko Fontainebleau, Las Vegas huku tukio hilo likishereheshwa na mwananmuziki, Jennifer Lopez.

Afrika iliwakilishwa na Tyla kutoka Afrika Kusini akiondoka na tuzo kupitia kipengele cha cha Msanii Pendwa wa Afrobeat akiwapiku mastaa kutoka Nigeria akiwemo Asake, Rema, Wizkid na Tems.

Katika tuzo hizo mwanamuziki Billie Eilish ameibuka kinara baada ya kushinda vipengele vyote saba ambavyo aliteuliwa ikiwa ni Msanii Bora wa Mwaka, Msanii wa Pop wa Kike Anayependwa, Albamu Bora ya Mwaka, Albamu ya Pendwa ya Pop 'Hit Me Hard and Soft', Wimbo Bora wa Mwaka, Wimbo wa Pop Unaopendwa zaidi kupitia wimbo wa 'Birds of a Feather' na kipengele cha Favourite Artist of Touring.

Wasanii wengine waliyoshinda tuzo nyingi ni Lady Gaga na Bruno Mars ambao walishinda vipengele vitatu kila mmoja, kikiwemo kipengele cha Wimbo Bora wa Kushirikina wa Mwaka kupitia wimbo wao 'Die With a Smile', na Video ya Muziki Inayopendwa kupitia wimbo huo huo. pia Lady Gaga amechukua tuzo ya Msanii Pendwa wa Densi ikiwa ni mara ya pili kushinda na Bruno Mars amechukua tuzo ya Msanii wa Pop wa Kiume Anayependwa hii ikiwa ni mara ya tatu kuchukua tuzo hiyo.

Wasanii wengine waliofanikiwa kunyakua tuzo usiku huo ni pamoja na Post Malone Msanii Pendwa wa Kiume wa Country na Wimbo Pendwa wa Country kupitia 'I Had Some Help' akiwa na Morgan Wallen.


The Weeknd imeshinda Msanii wa kiume wa R&B anayependwa ikiwa ni kwa mara ya nne sasa anashinda, lakini pia ameshinda kipengele cha Albamu pendwa ya R&B ikiwa ni mara ya tatu.

Eminem akiondoka na tuzo ya Msanii wa Hip-hop wa Kiume anayependwa ikiwa ni mara ya nne na kumfanya kumuongezea rekodi.

Beyonce ameshinda kipengele cha Albamu Bora ya Country inayopendwa zaidi kupitia albamu yake ya Cowboy Carter, hii inakuwa mara ya tatu kwa msanii mwenye asili ya Kiafrika kushinda katika kipengele hicho ambapo mwaka 1974 alishinda Charley Pride kupitia albamu yake ya A Sunshiny Day, na Kane Brown alishinda mwaka 2018.

Katika tuzo hizo Beyoncé pia ameshinda kipengele Msanii wa kike wa Country anayependwa . Tuzo hizo mbili zinamfanya kufikisha jumla ya tuzo za AMA 13, ambapo inamuweka katika nafasi ya tano akiwa na Rihanna kati ya wanawake wenye tuzo hizo nyingi. Wasanii wakike wanne ambao wameshinda tuzo nyingi zaidi ni pamoja na Taylor Swift (40), Whitney Houston (21), Carrie Underwood (17) na Reba McEntire (15).

Tylor Swift akiwa msanii wa muziki anaeongoza kuchukua tuzo nyingi za America Music Awards akiwa na jumla ya tuzo 40, hakufanikiwa kuchukua tuzo usiku huo baada ya kufungiwa, licha ya kuteuliwa vipengele sita katika tuzo hizo.

Wasanii wengine ambao wamefungiwa licha ya kuteuliwa kuwania vipengele vingi ni pamoja na Chappell Roan na Shaboozey walioteuliwa katika vipengele saba, na Sabrina Seremala aliyeteuliwa katika vipengele sita.

Utaratibu wa Wasanii kuteuliwa inatokana na mwingiliano mkubwa wa mashabiki kama inavyoonyeshwa kupitia chati za Billboard ikiwa ni pamoja na utiririshaji (Streams) katika majukwaa ya muziki, mauzo ya albamu na nyimbo, uchezaji wa nyimbo redioni, na pato la ziara. Vipimo hivyo vinafuatiliwa na Billboard na Luminate ambapo huchukua mwaka mmoja kupata taarifa na data sahihi, mchakato huo ulianza Machi 22, 2024, hadi Machi 20, 2025.