Kutokana na maendeleo ya teknolojia ulimwengu unaendelea kufurahia kazi za Charlie Chaplin, msanii maarufu wa vichekesho aliyezaliwa Aprili 16, 1889 London, Uingereza, alijulikana hasa kwa kutumia vipaji vyake vya kucheka na kuigiza bila ya kutumia sauti jambo lililopelekea awe na mchango mkubwa katika maendeleo ya sinema zisizokuwa na mazungumzo.

Licha ya kuzaliwa Uingereza mchekeshaji huyo anaelezwa kuwa alijifunza sanaa ya uigizaji kupitia maonesho ya majukwaani, na baadaye alihamia Marekani, ambapo huko alijitengenezea jina kubwa katika tasnia ya filamu.

Aina yake ya uigizaji ilikuwa na mtindo wa kipekee usiotumia sauti huku akionesha hisia na hadithi kupitia lugha ya mwili na uso badala ya maandiko au maneno. Hii ilimsaidia kufikia hadhira ya kimataifa bila kujali lugha ya mazungumzo.

Chaplin alijulikana kwa filamu kama 'City Lights' (1931), 'Modern Times' (1936), na 'The Great Dictator' (1940). Aidha alikuwa na talanta ya kuunda muziki wa kutumiwa kwenye filamu, ulitumia sana kwenye filamu zake. Baadhi ya kazi zake za muziki kama vile "Smile" na "Eternally," zimekuwa maarufu hadi leo.

Charlie Chaplin alifariki Desemba 25, 1977 Vevey, Uswisi. lakini urithi wake unaendelea kuishi kupitia kazi zake. Alipokea heshima nyingi ikiwa ni pamoja na tuzo kadhaa za heshima, na kazi zake zinaendelea kupendwa na kufundishiwa katika shule za sanaa na maeneo mengine ya elimu ya filamu.