Mwanamke mmoja katika jimbo la Jambi nchini Indonesia ameuawa na kumezwa mzima na chatu, kulingana na ripoti za eneo hilo - lakini nyoka anawezaje kumla binadamu? 

Jahrah, anayeripotiwa kuwa na umri wa miaka 50, alishambuliwa na chatu alipokuwa akielekea kazini kwenye shamba la miti ya mpira Jumapili asubuhi. 

Alitoweka na siku moja baadaye, wanakijiji walimkuta chatu akiwa na tumbo kubwa - wakamuua na kupata mwili wake ndani. "Mwathiriwa alipatikana kwenye tumbo la nyoka huyo," mkuu wa polisi wa Betara Jambi AKP S Harefa aliambia vyombo vya habari vya ndani.

Mwili huo ulionekana kuwa mzima ulipopatikana, aliongeza. Nyoka huyo alikuwa na urefu wa angalau mita tano, wenyeji walisema. Ingawa matukio kama haya ni nadra sana, hii si mara ya kwanza kutokea nchini Indonesia. Watu wawili hapo awali walisemekana kuliwa mzima mnamo 2017 na 2018.

Chatu humshambuliaje mwanadamu?

Chatu waliouwa watu nchini Indonesia katika kipindi cha miaka mitano iliyopita wanaaminika kuwa aina ya chatu wanaopatikana Kusini na Kusini-mashariki mwa Asia. 

Wanaweza kufikia urefu wa zaidi ya mita 10 sawa na (futi32) na wana nguvu sana. Wanashambulia kwa kuvizia, wakijificha karibu na windo lao na kuliponda-kandamiza kwa nguvu zaidi wakati mwathirika anatoa pumzi. Wanaua kwa kukosesha windo lao hewa na kama ni mwanadamu anapata mshtuko wa moyo ndani ya dakika.

Chatu humeza chakula chao kikiwa kizima. Miili yao imeunganishwa na mishipa inayonyumbulika sana ili waweze kujinyoosha urefu wa karibu na mawindo makubwa.

Linapokuja suala la kula watu, vizuizi ni "mabega ya binadamu kwa sababu hayawezi kuanguka," Mary-Ruth Low, afisa wa uhifadhi na utafiti wa Hifadhi ya Wanyamapori Singapore na mtaalamu wa chatu, aliiambia BBC katika mahojiano ya awali.

Je, wanakula wanyama wengine wakubwa?

"Chatu kwa kiwango kikubwa huli kundi la wanyama wenye uti wa mgongo pekee," Bi Low anadokeza, ingawa mara kwa mara hula wanyama wanaotambaa, wakiwemo mamba.

Kwa kawaida wao hula panya na wanyama wengine wadogo, alisema, "lakini mara tu wanapofikia ukubwa fulani ni kana kwamba hawasumbuki na panya tena kwa sababu haziwafai au kuwashibisha".

Kwa hivyo mawindo yao yanajumuisha wanyama wakubwa kama nguruwe au hata ng'ombe. Wakati mwingine ukubwa wa chakula unaweza kuhukumiwa vibaya.

Mnamo 2005, chatu wa Burma alijaribu kumeza mamba mzima huko Florida. Ilipasuka katika harakati hizo na wote wawili walikufa, miili yao ilipatikana na askari wa wanyamapori. Lakini wawindaji hawa wenye fursa wanaweza kuwa wachaguzi wa kushangaza pia.

Wakikosa mawindo yanayofaa, wanaweza kwenda kwa muda mrefu kwa kula chakula kidogo sana hadi hadi wapate chakula kikubwa cha kutosha. 

Je hii ni mara ya kwanza kwa chatu kumla binadamu? La hasha, huko Indonesia, matukio mawili sawia yaliripotiwa katika miaka mitano iliyopita.

Mnamo mwaka wa 2018, mwanamke alitoweka wakati alipokuwa akitembea kwenye bustani yake ya mboga katika mkoa wa Sulawesi. Viatu vyake na panga vilipatikana siku moja baadaye na chatu mkubwa, akiwa na tumbo lililojaa alikuwa amelala umbali wa mita 30 hivi.

"Wakazi walishuku kuwa nyoka alimmeza mwathiriwa, kwa hivyo wakamuua, walimtoa nje ya bustani," mkuu wa polisi wa eneo hilo Hamka aliambia shirika la habari la AFP.

"Tumbo la nyoka lilipasuliwa ndipo mwili wa mwathiriwa ulipatikana ndani." 

Na mnamo 2002, mvulana wa miaka 10 aliripotiwa kumezwa na chatu wa miamba huko Afrika Kusini. Na mnamo Machi 2017, mkulima alimezwa na chatu mwenye urefu wa mita saba huko Sulawesi nchini Indonesia. 

Mwaka huo huo, mwanamume mmoja kutoka jimbo la Sumatra nchini Indonesia alifanikiwa kupambana na chatu mwenye urefu wa mita 7.8 ambaye alimshambulia akiwa kwenye shamba la michikichi.Alinusurika na majeraha mabaya. 

Madai ya awali mara nyingi yalihusisha visa ambavyo vilikuwa vigumu-kuthibitisha ambavyo vilitokea muda kabla hazijaripotiwa, katika maeneo ya mbali na bila mashahidi wa kutegemewa. 

Mwanaanthropolojia Thomas Headland, ambaye alitumia miongo kadhaa miongoni mwa Agta, kundi la wawindaji-wawindaji nchini Ufilipino, alidai kwamba robo ya wanaume wa kabila hilo walikuwa wameshambuliwa na chatu wakati fulani.

Ingawa karibu wote waliwalinda kwa mapanga, mtu mzima Agta - ambaye kimwili ni mdogo - mara kwa mara waliliwa, utafiti wake ulisema. Mtaalamu wa nyoka Nia Kurniawan kutoka Chuo Kikuu cha Brawijaya nchini Indonesia, awali aliambia BBC Indonesia kwamba chatu huhisi mitetemo, kelele na joto kutoka kwa taa, hivyo kwa kawaida huepuka makazi ya watu.

Chanzo BBC