Ni kawaida kukutana na filamu ambayo wahusika wake hawaongei kabisa bali wanatumia vitendo kufikisha ujumbe, lakini ni ngumu kukutana na filamu ambayo haina muziki wala mdundo wa aina yoyote, hii ni kutokana na sanaa hizi mbili kuwa na ushirikiano wa ukaribu, huku kila moja ikichangia kwa namna yake katika kuunda ubora wa kipekee kwa watazamaji.

Kawaida muziki huenda sambamba na filamu kwa sababu husaidia kuunda na kuimarisha hisia na hali ya mazingira katika filamu. Nyimbo zinazowekwa kwenye filamu (soundtracks) zinaweza kujenga hisia maalumu, kama vile kusisimua, huzuni, au furaha.

Husaidia kuelezea hadithi au mtindo wa filamu kwa njia ya kipekee. Nyimbo au sauti maalumu katika filamu zinaweza kufikisha ujumbe wa kihisia ambao unaweza kuwa vigumu kufikiwa kwa maneno pekee.

Aidha muziki unaonekana kuwa na umuhimu katika filamu kwani husaidia kuonesha tamaduni, hivyo kusaidia kutambulisha na kutofautisha tamaduni moja na nyingine kwa kupiga midundo ya aina tofauti.

Pamoja na uunganishaji wa kihisia, muziki una uwezo wa kugusa hisia za watazamaji kwa njia ya moja kwa moja. Katika filamu, matumizi ya muziki huwaunganisha watazamaji na matukio yanayooneka.
Akizungumzia matumizi ya muziki kwenye filamu Rajab Mbogo mjumbe wa Maudhui kutoka
Azam Media amesema katika matumizi ya muziki ni muhimu kuzingatia unaoendana na maudhui.

“Ni muhimu kuzingatia muziki ambao unaendana na maudhui, upo mwingine ukiweka unapoteza kabisa maana ya hadithi, kila muziki au sauti kwenye filamu huwa na maana. Unaweza kutumia sauti ambazo zinaongezewa kwenye filamu ili kuongeza ubora.

"Sauti zinatengenezwa kwa aina mbili unaweza kununua mtandaoni au kutengeneza zako studio kwa kurekodi, sauti hizo kama vile za hatua, ndege, mlango kufunguka. Mfano ukienda kwenye soko unataka kusikia sauti za watu wakifanya manunuzi unaweza kurekodi sauti hizo na kisha kuzitumia ni muhimu sana kwenye filamu,”alisema