Zanzibar. Uganda imeibuka mshindi mkuu katika Tamasha la 28 la Kimataifa la Filamu (ZIFF) 2025 , ikichukua idadi kubwa zaidi ya tuzo katika makundi mbalimbali. 

Katika tamasha hilo, filamu ya kihistoria ya Janani: The Last Stand, iliyotungwa na Matt Bish, imeshinda tuzo ya Filamu Bora Ndefu. Filamu hii inaelezea maisha na ushujaa wa Askofu Mkuu Janani Luwum aliyeuawa wakati wa utawala wa kikatili wa Idi Amin. Aidha, Peter Odeke alipata tuzo ya Mwigizaji Bora akiigiza kama askofu.

Kwa upande  wa filamu za makala, Memories of Love Returned ya Uganda, iliyotungwa na Ntare Guma Mbaho Mwine, ilishinda tuzo ya Filamu Bora ya Makala. Filamu hii inaangazia urithi, sanaa na masuala ya jinsia kupitia kugundua upya kazi na maisha ya mpigapicha Kibaate Aloysius Ssalongo.

Katika filamu fupi, Boy No Fear iliyotungwa na Jonathan Curtiss, nayo kutoka Uganda, ilishinda tuzo ya Filamu Fupi Bora.

Mafanikio ya Uganda hayakuishia tu kwenye filamu bali yalijitokeza katika mfululizo wa filamu za televisheni, ambapo Mirembe Doreen alipata tuzo ya Mwigizaji Bora Mwanamke Afrika Mashariki kwa kazi yake katika Damalie.

Kutokana na ushindi huo majaji waliipongeza Uganda kwa utoaji wake wa hadithi zenye mvuto zinazotokana na mazingira halisi ya jamii lakini zikiwasilisha ujumbe wa kimataifa.

“Watengenezaji wa filamu wa Uganda walileta kiwango cha kipekee cha uhalisia mwaka huu. Kazi zao hazikuwa tu burudani, bali zilileta changamoto na elimu kwa hadhira, na hivyo kuacha athari kubwa,” alisema Dk. Mona Mwakalinga, mshiriki wa jopo la majaji wa filamu ndefu.

Kutambuliwa kwa sekta ya filamu ya Uganda katika tamasha hili kunakuja wakati ambapo kuna ongezeko la uwekezaji katika sinema Afrika Mashariki. Mafanikio ya Uganda katika ZIFF 2025 yanathibitisha umuhimu wa tamasha kama njia ya kuenzi sauti na simulizi za Kiafrika zinazogusa pande zote, nyumbani na duniani kote.